上年4月，原來我去咗揾個塔。
唔知幾時開始，我好驚見到背影。
十幾歲時喺屋企講最任性我係第二冇人敢認第一。個個星期都總有藉口出街，屋企張梳化永遠坐唔暖又唔見咗人，夠膽死同媽講”喂，隔離黃太叫我搬去佢度住喎，你有冇喼借俾我拿拿臨執拾細軟過去住啦”，父母驚我學壞有期玩接放學，我當時梗係火都嚟埋啦！心諗”讀幼稚園時又唔見你哋咁有恆心？反而淨係派阿婆嚟接我，依家良心發現啊？”死死氣俾阿媽接放學後自己一支箭咁行到老遠，全程攞個背脊得住佢擺明唔妥嫁啦！
後來大個咗，同兩老講自己要去闖江湖，為事業為愛情，近則去大陸住一年半載，遠啲啲就久唔久唔係去上海印度就去以色列，諗番起都覺自己好瀟灑。好啦依家學人嫁出香港跟佬走，去邊啊女？唔...未知嫁，呢期去住北京先，我搭飛機𠽌一聲就返到香港啦好近啫。哦。
女，又去邊啊？今次去埃及喔！老豆話讀萬卷書不如行萬里路嘛，我有得去模吓個千年古塔喎，正吖！哦。安全要緊啊。
女，今次又去邊啊？未知啊，總之時差有時7個鐘，有時6個，有時又11個，不過你要揾我隨時都可以嫁。哦。最緊要你開心知道嘛？
走遠了，一次比一次更遠。相隔十幾年，良心發現嗰個應該係我。原來我好自私，做女咁耐無數次的用背影為你哋留下記憶，無論2250或0615你必定嚟接機，偏偏每次送機你非必要等我入埋閘先肯走，又要俾個背脊你嘆。
再過幾個月我哋又再有背影禮了，個心好忐忑，到底你害怕再見到我嘅背影，還是我比你更害怕見到你那雙皺紋累累的手遠在閘外輕輕揮動。
#讀萬卷書不如行萬里路
#行萬里路先知你哋對我有幾好
Search